میں نے سوچا کہ کیوں نہ اس بلاگ کی وجہِ ایجاد و بنیاد بھی بیان کردوں ۔ شاید کوئی نو آموز صاحب یا صاحبہ اس میں دلچسپی رکھتے / رکھتی ہوں 
مجھے انٹرنیٹ ٹیکنالوجی بہت پسند ہے ۔ میں نے تقریباً دو سال پہلے کمپیوٹر خریدا ۔ جب میں نے کمپیوٹر خریدا تو مجھے کلک کرنے اور اور فولڈر یا فائلیں کھولنے کے علاوہ کچھ نہیں آتا تھا ۔ چنانچہ میں نے کمپیوٹر سیکھنے کو اپنا نصب العین بنا لیا ۔ نتیجتاً تقریباً ایک ماہ میں میں نے پوری ونڈوز کھنگال ڈالی اور کمپیوٹر میں “چیتا” ہو گیا ۔ اس کا ایک اور نتیجہ یہ نکلا کہ میں ایف ایس سی میں صرف ساٹھ فیصد نمبر لے سکا اور انجینیرنگ یونیورسٹی والوں نے میرے پاؤں پکڑے ، کہ بھائی آپ گھر میں آرام کریں ، یہاں یونیورسٹی میں خوامخواہ آپ کی تکنیکی صلاحیتوں کو زنگ لگ جائے گا ۔
جب کمپیوٹر سیکھ لیا تو انٹرنیٹ کیا مشکل تھا ۔ اس کو تو ویسے ہی حِسِ عامہ (common sense) نے لتاڑ دیا ۔ ایک دن میں نے اپنے دوست خان صاحب سے پوچھا کہ یار ، یہ ویب سائٹیں کیسے بنتی ہیں۔ انہوں نے بتایا کہ اس کے لیے ویب پیج بنانے پڑتے ہیں جن کے لیے HTML کی ضرورت ہوتی ہے جو کہ کمپیوٹر کی ایک زبان ہے اور یہ تم جیسے عقل کے اندھے کی سمجھ میں نہیں آنے والی ۔ میں نے ان سے بہت کہا کہ مجھے بھی سمجھائیے یہ کیا ہے ، مگر وہ نہ مانے 
مگر بندہِ ناچیز نے بھی ہمت نہ ہاری ۔ میں نے یہ کیا کہ جو ویب پیج بھی کھولتا اس کا سورس کوڈ نوٹ پیڈ میں دیکھنا شروع کردیتا ، پھر اس کا کچھ حصہ ڈیلیٹ کر کے دیکھتا کہ کیا فرق پڑا ہے ۔ اس طرح کرتے کرتے میں نے ایک ماہ میں ایچ ٹی ایم ایل سیکھ لی ۔ اس کے بعد مجھے اس سے متعلق ایک کتاب ملی ، میں نے کچھ اپنا سر پِیٹا اور کچھ کتاب کو بے نقط سنائیں کہ کمبخت! تو نے ابھی ملنا تھا ، کچھ دیر پہلے مل جاتی تو تیرا کیا بگڑ جاتا ۔
اب میں نے یہ بلاگ بنایا ہے اور اس بلاگ کو معلومات کی فراہمی کا ذریعہ بنانا چاہتا ہوں ۔
Harris – حارث کا تبصرہ بوقت Wednesday, April 06, 2005 3:58:22 AM
الو کے پٹھے یہ تم ہو؟
