نائی محلے کی دائ

کہتے ہیں نائی محلے کی دائی ہوتا ہے ۔ نائی کے متعلق لکھنے کا خیال ایسے آیا کہ ایک انگریزی فلم میں ایک نائی دیکھا جو نہایت خاموشی سے اپنا کام کر رہا تھا ۔ لہٰذا ہم کہہ سکتے ہیں کہ یہ بات صرف برصغیر پاک و ہند کے نائیوں تک ہی محدود ہے ۔

نائی کی دکان کا ماحول کچھ یوں ہوتا ہے کہ ایک کونے میں اوپر ٹی وی رکھا ہے جس کے ساتھ سیٹلائیٹ چینلز کی کیبل منسلک ہے ، آپ گود میں اخبار لے کر کرسی پر تشریف فرما ہیں ، ساتھ ہی حضرتِ مشاط موجود ہیں جن کی قینچی اور زبان یکساں رفتار سے دوڑ رہی ہے ۔ حجام صاحب آپ کی گت بنانے کے ساتھ ساتھ محلے میں موجود خواتین و حضرات اور عالمی مسائل پر اپنے ماہرانہ تجزیے سے آگاہ کر رہے ہیں اور وقفے وقفے سے آپ کی رائے بھی معلوم کر رہے ہیں جسے یقیناً مثبت ہی ہونا چاہیے ۔ اردگرد کچھ افراد اپنی باری کا انتظار کر رہے ہیں ، ان افراد میں پیر و جوان دونوں شامل ہیں ۔ کچھ نوجوان آپس میں محوِ گفتگو ہیں اور کچھ ٹی وی پر دکھائے جانے والے “علم الابدان” سے استفادہ کر رہے ہیں ۔ بزرگ حضرات بظاہر اخبار لے کر بیٹھے ہیں لیکن تھوڑی تھوڑی دیر بعد کنکھیوں سے ٹی وی پر ناچنے والی صنفِ نازک کے کردار سے متعلق معلومات حاصل کرتے ہیں اور پھر اپنی عمر کا لحاظ کرتے ہوئے استغفراللہ پڑھ کر دوبارہ اخبار کی طرف متوجہ ہو جاتے ہیں ۔

اب تو شہروں میں موجود نائیوں کے اختیارات محدود ہو گئے ہیں ، مگر دیہات میں پرانی صورتِ حال برقرار ہے ۔ کچھ دہائیاں قبل تک نائی علاقے کی اہم ضرورت ہوتا تھا ۔ یوں تو وہ حالاتِ حاضرہ و گزشتہ کا عالم ہوتا تھا لیکن اس کے ساتھ ساتھ وہ عامل بھی تھا ۔ یعنی علاقے میں ہونے والے بیشتر کام اس کے ہاتھوں انجام پاتے تھے ۔ کسی بھی تقریب کے مہمانوں کو بلانے کی ذمہ داری نائی کے سپرد کی جاتی تھی (اس وقت دعوتی کارڈوں کی بدعت ایجاد نہیں ہوئی تھی) ۔ نائی گھر گھر جاکر لوگوں کو تقریب کے متعلق آگاہ کرتا تھا ۔ پیدائیش ، شادی ، فوتگی ، سیاسی و مذہبی نوعیت کی تقریبات میں دیگیں پکانے کا کام بھی یہی کرتا تھا ۔ پیدا ہونے والے بچے کی جھنڈ اتارنے اور ختنہ کرنے کا فریضہ بھی نائی ہی انجام دیتا تھا ۔ تعلیمی مدرسوں سے جو طلباء بھاگ کر آتے ان کو واپس مدرسے میں استاد کے سپرد کرنے اور استاد کے پیغامات والدین تک پہنچانے کا کام بھی کرتا ۔ دو ملاؤں میں مرغی حرام کرانے اور خفیہ طور پر اِدھر کی اُدھر لگانے یعنی لگائی بجھائی کرنے کا کام بھی بعض منفی طبیعت کے حامل نائی انجام دیتے تھے ۔ لگائی بجھائی کرنے کے کام تو جدید نائی بھی بخوبی انجام دیتے ہیں ، خیر یہ تو ہماری پوری قوم کا ہی خاصہ ہے ۔ حالاتِ حاضرہ پر تبصرہ کرتے وقت حجام نہایت وثوق سے اعلان کرتا ہے کہ امریکہ کا اگلا قدم کیا ہوگا اور ملک کے اربابِ اقتدار کتنی رقم پر اپنے ضمیر کا سودا کرنے کے لیے تیار ہوں گے ۔

کہتے ہیں کہ قائدِ اعظم نے ساری زندگی میں صرف ایک شخص کے سامنے سر جھکایا جو کہ اُن کا نائی تھا ۔ بڑے بڑے سر پھرے نائی کے آگے سر جھکانے پر مجبور ہوتے ہیں ۔ بڑے بڑے سیاستدانوں، بدمعاشوں اور امیروں کی نائی کے سامنے بس ہو جاتی ہے اور وہ بخوشی نائی سے “حجامت” بنواتے ہیں ۔ چمپی کرنے کے بہانے نائی ان سے گِن گِن کے بدلے لیتا ہے اور ان کے سر پر ایسی تال بجاتا ہے کہ مضروب کی مضراب بج جاتی ہے اور اس کے ہوش ٹھکانے آ جاتے ہیں ۔